السر ديال العيالات الحادكات كيفاش كيديرو جميع الأشغال المنزلية و كيشيط ليهم الوقت…البرنامج لي حتى واحد مبغاكش تعرفيه!!.
روتين النهار :
إلا كنتي خدامة فيقي مع 5h صباح و توضاي صلي الفجر راه فيه بركة وأجر عظيم ،قادي حالتك و دخلي الكوزينة وجدي الفطور و غداء الوليدات
و مع 6h فيقي وليداتك و غتشوفي بلي غيفيقو كلهم نشاط و حيوية و مغاديش تعدبي معاهم فالفياق.
وجدي الوليدات و حطي ليهم الفطور و هانتي غتكوني واجدة بلا أعصاب بلا متعطلو ما والو..
أما بالنسبة لي كالسة فالدار فتاكدي إلا درتي نفس الروتين غتلقاي راسك ربحتي الوقت بزاف و مرتاحة و كيبقا ليك النهار كولو ديالك،فالصباح غطيبي فيه الغدا و الكاسكروط و علاش لا حتى العشاء …كطيبي كلشي فالصباح و ديري الميناج و كتبقا ليك العشية خاوية كلها تقدري تقراي فيها او ديري شي حاجة لي كتبغي .. و ملي غيجيو وليدلتك غتكوني كلك طاقة باش تعتاني بهم.
روتين الليل :
أول حاجة حبيباتي هو النعاس بكري لي عندها الاطفال تنعسهم مع 19h30 أو مع 20h00 اكثر شيء حتى يشبعو النعاس و يرتاح الدماغ ديالهم و كتهناو من أمراض قلة التركيز و الفرط في الحركة و العصبية.
أما نتي كأم فغتقومي بالتحضير للوزام الغد من ملابس المدرسة و صينية الفطور و كتوجدي حتى أشنو غطيبي للغداء كأنك تشرملي اللحوم او حسب اشنو غطيبي..
و غتحاولي تخصي وقت ليك واخا يكون فقط ربع ساعة،من بعد غتحاولي تنعسي مع 22h أكثر شي.
ملاحظة : بالنسبة للبنات لي كتجيهم السخفة بزاف و مكتكونش عندهم الطاقة،بقاو تاخدو ملعقة حلبة على الريق أو لي مكتبغيش الحلبة تاخد النافع إما مطحون ،أو حب أو تخوي عليه ماء غليان و تخليه يترقد و تشربي الماء ديالو…صدقوني إلا جربتو هادشي لي قلت ليكم غادي ترتاحو فحياتكم،و متنساونيش من الدعوات ديالكم الطيبة و لكم المثل إن شاء الله.
