الكوكلي معمر لي كندير للعائلة بطريقة مختلفة…عجب حتى لوليدات




هاد الكوكلي من عند الاخت مفيدة من منتدى اناقة مغربية :
هدي واحد الطريقة ديال تعمار الكوكلي كتجي غزالة دارتها شميشة وجربتها جات فعلا كتستحق وكنها نبدلو شوية
نوجدو الحشوة
غدي نديرو مقلة فيها شوية الزيت العود والرومية ونشحرو بصلة متوسطة مع 2 ضروس الثومة +نزيدو 2م ك موطارد +وشوية صلصة الصوجا شي 3 م ك+وشوية زعيترة وبزاروملح مكنتروش حيت الصوجا مالحة
نخلطو كلشي مزيان نزيدو شوية الروز مصلوق من قبل وشوية الشومبنيو اسود مرطب في الماء طايب ومقطع صغير نخلطو مزيان ونزيدو شوية القشدة الطرية نخلطو مزيان ونخليو الحشوة تبرد عاد نزيدو في الاخير شوية المودزغيلا محكوكة نخلطو وهاهي الحشوة ديالنا واجدة نعمرو الكوكليات ديالنا نجمعو ليهم الرجيلات
في طنجرة نديرو شوية الزيت العود مع الزيت الرومية وبصلة ونشحروهم انا درت حتى العنيقات ديال الكوكلي نشحرو الكوكليات غير شوية من كاع الجناب نديروهم في طبق الفرن ندهنوهم بالموطارد وندخلوهم الفرن يكملو طايبهم ويتحمرو البصل لبقى لينا نشحروه مزيان ونزيدو عليه مرق الدجاج انا درت كاس الماء طايب ودوبت فيه ضامة البنة الدجاح نزيدو الشومبنيو والفلفلة مشوية ومقطعة نخلطو كلشي مزيان ونزيدو شوية الزعيترة والبزار مني يقلال المرق نزيدو لاكريم فريش ونخليوه حتى يغلى مزيان مني يتحمرو لكوكلي نديروه في طبق التقديم ونرافقوه بالصلصة ديال الشومبنيو والفلفلة كيجي رروعة ومختلف على المعتاد وعجب حتى الوليدات

بالنسبة للحشوة لبقات لي شحرت شوية خيزو و الكرعة محكوكين وزدتهم على الحشوة وزدت شوية لاكريم فريش ومليحة وبزار وقدمتهم حتى هما مع الطبق نتمنى الطبق يعجبكم وبالصحة والراحة.