خمس بيضات على درجة حرارة المطبخ فوقهم رشة ملح و كاس مش مليان سكر عادي
نضربهم بالبيترا او الباتور من عشرة لربع ساعة حتان يضاعف حجمهم و يولي الخليط ابيض
نضيف فنجان ماء دافي مش سخون يغلي بلى من منخط
نزيد فوقهم كاس فرينة و باكي خميرة نوارة مغربلين على ثلاث دفعات و نخلط بواسطة ملعقة مسطحة من تحت للفوق بالشوي باه تحافظي عالهوا الي فالخليط
ندهن الصينية مليح بالمارغرين فوقها الفرينة مرشوشة و نصب الخليط فيه
الفرن يكون سخون مسبقا بصح مش سخون بزاف انتي سيدتي شعليه كي تلحقي للمرحلة تاع انك ديري الفرينة و خليه ناقص لانه كي يكون سخون تطلع و تتحرق و مالداخل تقعد عجين
كي دخلي المول للفور زديله طيب على درجة 160 170 مش اكثر
و الي الفور تاعها يشعل مالتحت و الفوق طيبها مالتحت قبل و مباعد مالفوق
كي طيب تخليها تبرد و تتقطع على ثلاثة طبقات
تسقي كل طبقة بشاربات خفيفة كاس ماء مع نص كاس سكر و عصرة قارص كي يغلوا فوق النار احسبي سبع دقايق و طفي النار تحتهم او الماء الي نلقاوه في لناناس او الخوخ الكونفي
بعد ما تسقي الطبقة الاولى ديري الحشو عبارة عن كرام شونتي مئة غرام شونتيي بودر مع كاس حليب بارد و تخدميهم بالباتور او كريمة الزبدة مئة غرام زبدة مع مئة غرام سكر ناعم و تنكهيها بلفاني و اخدميهم بالباتور او اي كريمة تفضليها و اي نكهة تفضليها و متتقيديش بالكمية هذي انا عطيتك الاساس و انتي ضاعفي الكمية حسب حجم لتارت تاعك و تقدري بعد ما تحطي الكريمة فوق كل طبقة جينواز تحطي فوقها فواكه مقطعة صغيرة او اذا كانت تارت شيكولا رشي مكسرات محمصين و مرحيين و كملي حشو كل الطبقات بنفس الطريقة
و كي تكملي حشو الطبقات بالكريمة و الفواكه او المكسرات غلفي لتارت كامل بالكريمة و حطيها ساعة فالفرجيدار
و التزين يبقى اختياري
