سفة مدفونة ساهلة وبنينة مرفوقة بعصير الحامض المنعش واللذيذ …جربيها وردي عليا




إليك يا لالة طريقة سهلة وبسيطة لتحضير سفة مدفونة ستعجبك بالتأكيد، مرفوقة بعصير الحامض اللذيذ والمنعش.
المكونات وطريقة التحضير



نصف كيلو شعرية السفة رقيقة، ندهنها مزيان بالزيت ونخليها تفور تقريبا مدة 20 دقيقة .ومن بعد نزولها ونوضعها فبانيو ونخوي فوقها الماء لي فالبرمة ونعاود نصفيها في الكسكاس والما نردو للبرمة ونرجعها تفور مدة 15 دقيقة ونعاود ثاني نفس الشيء . حتى تبان لي طابت ونعمل ليها الملح ومعلقة كبيرة زبدة ونحركها مزيان .


ناخذ الزبيب ونصلقو مع عود قرفة وشوية السكر ،  وناخذ تقريبا نصف كيلو دجاج او حسب عدد الافراد ونديرو اتقلى مع شوية الزيت والماء والعطرية عاد نزيد جوج بصلات مشلطات مع الربيع وزعفران شعرة وعود القرفة ونسد عليها طيب مع كاس ديال الماء وملي اطيب نزول للدجاج لعضومة ونخلي البصلة حتى تختار مزيان ونضيف ليها معلقة ديال السكر ونخلطها مع الدجاج .


ملي نبغي نقدم الطبق نديرو افور ثاني ونضيف ليه سكر كلاصي حسب الذوق ونفرش نصف الشعرية فالاناء ثم الدجاج ديالنا عاد النصف الاخر ونزين الوجه بخطوط القرفة واللوز والبيض والزبيب …وبالصحة والراحة .


عصير الحامض : حامضة مغسولة مزيان ومقطعة بقشرتها مع اترو ماء وكاس سكر ونطحنو كولشي فمولينكس ونصفيوه فالصفاية ونقدموه بارد .