اليوم جبت ليكم زيتون منسم من المطبخ ديالنا
الا عندكم الزيتون ديال الدار غيكون احسن مكانش غتشري 1 كيلو زيتون احمر عادي
غسليه و صفيه
غتقسميه في 6 القرعات
1 – زيتون + حامض مصير + قليل من الملح
2 – زيتون +كمون+شوية ابزار+ تحميرة+ملح + زيت الزيتون الكافي باش يتغطى الزيتون
3 – نفس المقادير ديال – 2 – هي كتزيدي عليه الزعتر وراق
4 – نفس المقادير ديال – 2 – هي كتزيدي شوية الهريسة
5 – نفس المقادير ديال – 2 -هي كتزيدي الزعتر وراق و شوية الهريسة
6 – نفس المقادير ديال – 2- هي كتزيدي عليه 1 او 2 فروع ديال التومة مقطعة على 4 على حسب كمية الزيتون لي عندك
و بهاد الطريق غتحصلي على 6 الانواع ديال الزيتون لي غتزيني بيه الطابلة ديالك و لي ميملوش منو حيت كل مرة حطي ليهم من جهة
و غيستافدو من فوائد الزيت و الزيتون و الاعشاب المنسمة
و حاجة اخرى ملي كتحطي الزيت لي بقا فيه ليقامة كتنسمي بيه البيتزا ديالك او المعجنات عند التقديم
و ملي كيتقادا ليك الزيتون كتزيدوا زيتون اخر على الزيت لي بقا عندك و شوية ليقامة
.. ..سدي عليه القرعة و بداي تاكلي منو من بعد 24 ساعة
و كيبقا بلا تلاجة عادي المهم يكون الزيتون مغطي بالزيت
و حتى منظرو في الكوزينة روعة
يعني حج و حاجة
المهم ميكونش فيه الماء باش ميخسرش ليك
و بالصحة و الراحة
