طريقتي الفعااالة والساااهلة فتنظيف الزرابي و الطلامط منين ميكون فيا ما نصبنهم




السلام عليكم البنات كيدايرين اوا الحمد لله
هاد الطريقة ديال تنظيف الزرابي و الطلامط وليت كنديرها مدة هادي و عجباتني و هناتني من تصبينهم في كل وقيتة( راه لابد من الصابون مرة مرة غير هي هاد الطريقة كتهنيني مرات كنمسحهم و مرة كنصبنهم ) أقسم بالله و ربي شاهد علي بأنهم كيرجعو كيشعلو و لي شافهم ما كيتيقش بأنهم ما مصبنينش
المهم بلا كثرة الكلام ههههه
الطريقة ساهلة
بالنسبة للطلامط كناخد سطل صغير و كندير فيه شوية الماء و سانيكروا صافي و ناخد شي زيف يكون رطب و نبقى ندخلو في هداك السطل و نعصرو و نمسح به الطلامط و هما ملمطين في بلاصتهم و من بعد كنحل السراجم حتى كينشفو و الله حتى كيوليو نقيين وفيهم ريحة غزالة
و نفس الطريقة بالنسبة للزرابي غير هو مرة كندير الزيف ( و الصراحة كيخرج أحسن غير هو كيشد شوية دالوقت ) و مرة كندير الشيتة الصغيرة الحرشة باش كنصبنو الزرابي و حتى هي مزيانة و بالنسبة للزرابي لي مشعرين أو نخافو عليهم نديرو غير الزيف و تبقاي دوزي شوية و تشلليه في السطل
و بالنسبة لي أنا كنحيد الزرابي من بلاصتهم و نسوسهم مزيان في السطح و كندير هاد الطريقة و كنخليهم ينشفو شوية في الشمس على ما كنسيق الدار و نرجعهوم لبلاصتهم و لكن ممكن تمسحيهم في بلاصتهم و تحلي السراجم و تخليهم حتى ينشفو
نتمنى تعجبكم طريقتي و تجربوها و تردو علي
و نتمنى الحادكات كل وحدة تعطينا طريقتها في تنظيفهم و بلا صابون لحقاش قهرنا
لي عجبها موضوعي تدعي معاي بالشفاء و مع وليداتي بالصلاح الله يجازيكم بخير