حتى نتي كتحيري شنو توجدي للعشاء…أجي نقولك واحد الفكرة بسيطة صحية و غير مكلفة




انا مكنديرش العشا كندير كاسكروط فيه كلشي راجلي لي جي من صلاة المغرب كيلقى الطبلة موجودة مع ستة ناكلو مزيان و في الليل الديسير دانون

المهم انا بطاطا مسلوقة تقريبا ديما حاضرة حيت القلي مكيبغيهش راجلي كيدير الريجيم كندير بطاطا مسلوقة او مفورة نديرليها زيت الزيتون و مرات كنشلظ غير شوية د البصلة معاها ندير كامون و السلاطة دائما حاضرة خاصة الطماطم مع زيت الزيتون و الحبق مجفف او اللازريجانو و زيت الزيتو و مليحة و خل و كندير حتى الشيفلور مسلوق و اي حاجة تنفع سلاطة المهم تكون خفيفة مرة كنشوي معاها كفيتة مرة كنديرها غير كويرات صغار تكون مشرملة كنديرها في طاجين او مقيلة غير تطلق الما ديالها نزيد عليها شوية د لاصوص و نخليها تقلى مزيان كتجي رائعةو لاداند كنقطع البصلة بشكل طولي كنديرها تهبط غير شوية نظيف عليها داند مربعات ماشي كبار نزيد القسبر و الثومة و العطرية كندير حتى الكاري كيجي معاه و خلي كلشي يتقلى حتى يولي لاداند بحال مشوية اللون ديالو كيجي رائع


ممكن ديري بيري د البطاطا خاصة الوليدات كيجي رائع كنسلق بطاطا نمعكها مزيان مع شوية د الحليب و الفرماج كنشرمل شوية د الكفتة و نشلظ بصلة في المقلاة لي طيح نضيف عليها كفتة حتى تولي مفرتتة كاملو و طابت ندير طبقة اولى د بطاطا نضيف عليها طبقة ديال الكفتة و نغطي بالبطاطا و ندردر الجبن و ندخلها الفران يذوب الفرماج كتجي رائعة و زيدي معاها سلاطة


اما الصدر ديال الدجاج ديما كنخليه كنديرليه واحد الطريقة كيجي لديد متشبعيش منو كنشد الصدر نقطعو بحال شرائح طوال و ماشي غلاض نزيد عليه بصلة صغيرة مشلظة ثومة محكوكة و قسبرملحة كامون سكنجبير زعفران و ادا كتبغي الحار زيديه و زيت و عصرة ديال الحامظ ادا موجود خايه اترقد شوية ف هاد الشرمولة و شدي زلافة ديري فيها بيضة و شوية د الحليب قليل و نقيطة د الخل و شابلير ديريها ف زلافة اخرى و دوزي الدجاج في البيض من بعد الشابلير و قليه غير اتحملر قلبيه دغيا كيطيب و كيجي هائل جربوه و ردي عليا دابا نديرو و نصورو ليكم و المزيان فيه ممكن توجديه مثلا ف الغدا و ديريه ف الثلاجة لي ديري العشا غير تقليه و زيدي معاه براد د اتاي و سلاطة


الدجاج ديري لي قدك و ديري معاه غير بصلة صغيرة الثومة و العطرية لي تحتاجي و القسبر و شرمليه و ديريه في بلاطو فران غطيه بالمنيوم و دخليه الفران اطيب على خاطرو مكنديرش ليه الما كنرافقو بالروز كندير البصلة مشلظة في المقلاة تقلى و نزيد معاها طرفات الدجاج و فلفلة مقطعة صغيرة و قسبر و العطرية و كنور لي تقلا كلشي نضيف عليها الروز مسلوق و نخلط و ها هو واجد او ادا بغيتي ديري طريقة اخرى كتجي لديدة حتى هي كنشلظ البصلة و تقلى شوية كنزيد معاها هادوك الريوس د كلمار و ادا بغيتي حتى طريفات الدجاج القسبر الثومة اتقلاو شوية و تزيد العطرية و ورقة سيدنا موسى و الحار و تظيفي الروز و تروي اطيب الروز و اشرب الما ديالو ديريه ف بلاطو و دخليه اتحمر ف الفارن شوية