واحد شرمولة كنديرها كتخلي كلشي حاير اش فيها وديما عندي واجدة وكتصبر لأكثر من شهر




السلام عليكم و رحمة الله تعالى و بركاته

سمحولي حبيباتي نعطيكم طريقتي اللي كتخلي التشرميلة دائما موجودة عندي ف الدار و كنوفر بها الوقت والجهد وحتى الفلوس
باش مانطولشي عليكم الطريقة كالتالي


كناخدو القصبور و المعدنوس بكمية كبييييييييييييييرة كنغسلوهم مزياان و كنبيتوهم يقطرو من الماء حتى كيصبحو ناشفين تقريبا ثم كنقشرو كمية كبيرة أيضا من الثوم كناخدو وعاء كبير ديال البلاستيك يكون عندو الغطاء كنقطعو فيه القصبور و المعدنوس و الثوم كنضيفو عليهم الملح و الزيت بكمية معقولة و كنطحنوهم بالماكينة ديال المايونيز مزيان و كنسدو الوعاء ديال البلاستيك و كنحطوه فالثلاجة عادية ماشي الفريكو و ها التشرميلة واجدة عندك فأي وقت وكتصلح لجميع الوصفات


الدجاج اللحم الحوت الكفتة المعجنات يعني بتاع كلو  وكتصبر حتى شهر و أكثر ما


كيتبدل لها لا لون و لا طعم


جربوها وما عدندموشي و اللي جربتها ما تنسانيش بدعوة الخير في ظهر الغيب


  بالنسبة للحبق حتا هو ممكن يتطحن مع التومة و الزيت البلدية و الملح راه كيجي فن مع المقرونية و الاومليط انا كنت كنشريه قريعة صغيورة و غالي و دابا مللي شت نتيجة ديال الخليط الربيع بالتومة و الزيت قلت علاش لا مانديروها للحبق و كتسما صلصة البيستو


نتمنى تجربوها وتردو عليا