حبيباتي الغزلات جيت اليوم وجبت ليكم طبق الكسكس بالديالة الخاص بمناسبة عاشوراء ولي هو اهم طبق عندنا على مائدة الضيوف والعائلة في هذا اليوم المميز.
المقادير والطريقة :
نقطع أطراف الديالة أو القدّيد بعدما نفزكٌها في الماء ليلة كاملة ، 4 بصلات مقطعين شرائح ، الحمص مفزكٌ ، الزبيب مغسول حتى هو مفزك في الماء ، كأس العنبة من الزيت ، قزبور و معدنوس مربطين ، خرقوم ، إبزار ، سكنجبير، ملح+ خضر الكسكس المراكشي .
نعمل أطراف الديٌالة في برمة الكسكس و نعمل عليها جميع التوابل ونخليوها تتقلٌى شوية من بعد نعمل فيها الماء الكافي ندهن الكسكس بزيت الزيتون ونرشه بالماء الكافي ونبسبسوه لما تغلى الطنجرة نعمل فيها الحمص يطيب.
ونعمل الكسكس في الكسكاس فوقه يتبخر ثلات تبخيرات في كل تبخيرة نكبه في قصرية ونرشه بالماء مخلط بشوية الملح في التبخيرة الثانية نعمل الزبيب ونخليوه يطيب بعد التبخيرة الثالتة نعمل في الكسكس ملعقة كبيرة السمن و نبسبسوه عند التقديم نعمل كسكس عاشوراء بالديالة أو القديد لي حضرنا في القصرية.
و الباقي تعرفونه وقدموه مرفوقا بالمرق ولا تنساوا اللبن.
