اليوم صبنت واحد السربيتة “زيف” شفتو غمل ولا كله منقط بالغمولية وجربت هاد الفكرة بغيت نشاركها معكم.
خديت “بيكربونات الصودا” اصلا ديما عندي في الدار بحال الخبز ضروري خاصها تكون عندي لفوائد التنظيف الي فيها.
المهم مشيت شديتها وكبيت كمية كبيرة على المنطقة الي فيها الغمولية وكبيت جافيل وخليت الخليط فيها عاقد وخليتهم يترقدو جهد 5دقائق المهم حتى كملت رجعت شفت البقع الي فيها الغمولية كلها مشات بحال كنت كنكذب وبلا تمارة شليت السربيتة لقيتها كتشعل.
ونزيدك اي حاجة عندك موسخة معليك غير بيكربونات الصودا هي الي غتهنيك يمكن ليك تحكي بيها المرحاض والقصعة ديال المرحاض “اعزكم الله” اولفابو و
الصفورية الي في الزليج.
وحتى اللي عندها الرطوبة فالدار معليك غير ترشي البيكربونات تحت المضارب مثلا هما كيشدو الغمولة بزاف او فالبلاكارات او اي حاجة عندك فيها الرطوبة والغمولة.
خذيها عند الصيدلية 3 دراهم للباكية .
ايلى كنتي غتستعمليه للمناطق الكحلة مثلا مناطق ضيقة متوصليهاش.
ديري عجينة بحال الي في الصورة واستعني بشيتة السنان.
والاخوات الي كيعانيو من الغمولية الي في الخشب شدي شوية الما والخل وبيكربونات الصودا وديريها في “بخاخ”.
ورشي بيه الخشب ومسحيه في الاخير مزيان وخليه يتشمش شوية صافي وردي لبلاصتو.
