نقترح عليك سيدتي السفة المدفونة بالدجاج مذاق أكثر من رائع
المقادير:
- شعرية الرقيقة نتاع السفة حسب الرغبة.
- الزبيب.
- نصف دجاجة.
- 3 بصلاة مقطعين مربعات صغيرة.
- شوية قصبر ومعدنوس معقودين.
- الزيت.
- الملح.
- حبة كحلة(إبزار).
- سكين جبير.
- خرقوم.
- قرفة.
- سنيدة.
الطريقة:
نخدو قصعة نديرو فيها الشعرية وندهنوها بالزيت مزيان ونديروها تفوار 15 دقيقة نخليوها تفوار ونشدو الكوكوط نديرو فيها شوية الزيت والدجاج والبصلاة والملح منكتروش لملح حيت مغاديش نخليو فيه المرقة ديال الدجاج غدي نشفوه مهم الملح والخرقوم نقليو مزيان ونضيفو شوية الماء لي يطيبنا داك الدجاج ونديرو شوية حبة كحلة شوية سكين جبير وشوية قرفة وربيع ونسدو الكوكوط حتي يطيب الدجاج مبعد ما يطيب نحيدو الدجاج نخليو يقطر ونحيدولو لعظام وجلدة ونفتوه شوية شوية ونشعلو على الكوكوط ونردولها الدجاج ونديرو عليه واحد 2 معالق كبار سنيدة وشوية الزبيب ونخليوها على نار مهيلة تشحار حتى تنشف وتعسل ونحيدوها على النار ونخليوها إلى حين التقديم.
نرجعو لشعرية مبعد ما فورت ربع ساعة نحيدوها نخويوها فلقصعة ونرشوها بالماء مزيان ونخليوها حتى تشرب ونردوها لكسكاس تفوار 15 لدقيقة أخرى ومبعد 15 دقيقة نعودو نخويوها فلقصعة ونحلوها مزيان بين يدينا ونرشوها بالماء ونديرولها الملح ونخليوها تنشف ونردوها تفوار 20 دقيقة ومبعد ما دوز 20 دقيقة نحيدوها ونخويوها فلقصعة ونفورو الزبيب ونديروه عليها ونديرولها شوية سنيدة وندهنوها بالزبدة مزيان وتقديم حسب الرغبة أنا ستعملت لمول ديال الكيكة درة طبقة شعرية وطبقة نتاع الدجاج وزبيب والبصلاة ونغطيوها بطبقة ديال الشعرية ونتكاو عليها بيدينا مزيان ونقلبوها فطبسي التقديم وتزين حسب الرغبة.
