كراتان الكريب بالكفتة والبيشاميل والفرماج
المكونات والطريقة:
كناخد زوج كيسان كبار ديال الحليب،كنديروهم في الخلاط الكهربائي، كنضيف زوج بيضات وتقريبا ربع كأس زيت الزيتون( اللي بغات دير الزبدة ديرها أنا في المملحات كيعجبني نخدم بالزيت البلدية).شوية الملح.ابزار. كنطحن كلشي،كنبقا نضيف الدقيق بالتدريج حتى يولي كريمي،ثم كنطيب الكريب فمقلاة مكتلصقش.
صلصة البيشاميل:
فكاسرول كندير ملعقة دقيق،معلقة زيت الزيتون أو زبدة اللي بغيتو،نديرهم فوق النار ونحرك حتى يمتزج الخليط،كنضيف الحليب.درت تقريباً نصف لتر تقريباً بغيتو اكون خفيف ماشي ثقيل(في العادي راه معلقة معلقة كيمشيو مع ربع لتر حليب)،كنحك ضريس ديال الثوم في البيشاميل،غي زيدوها على ضمانتي وخليوها بيناتنا واخا هاد الحيلة كنت قلتها لكم شحال هادي ،كنتبل بالملح والابزار ( اللي بغات تزيد رشيشة ديال الݣوزة ديرها)،فاش كيعقاد كنطفي البوطة عاد كنضيف الفروماج القياس اللي بغيتو والنوع اللي بغيتو.
الحشوة:
خديت بصيلة حتى قطعتها درت معاها واحد البورو،درتهم في مقيلة ضفت زيت الزيتون وتبلت بشوية ملح.ابزار.سكنجبير.خرقوم.قرفة( فينما درتو حشوة بالكفتة ضيفو شوية القرفة)حتى هادي حيلة كنت تقاسمتها معاكم شحااااال هادي)،نخلط مزيان،وكنضيف الكفتة،وفاش طابت ضفت شوية من صلصة الطماطم(أي صوص معتمد عندكم)بحال ايلا غادين تصايبو صوص بولونيز غي هادي مافيهاش الجزر والكرافص.
كناخد المول كنلبسو بورق الطبخ وندهنو بزيت الزيتون،كنحط الكريبة الأولى،كندير طبقة من الكفتة،كندير فوقها البيشاميل،ثم طبقة من خليط أجبان ديرو أي نوع متوفر عندكم(أنا هنا درت الݣودا ديال الابزار والبيسطو الحار)،كنغطيها بكريبة ثانية وهكدا حتى نكملو الكمية كلها،ثن ندخلوها للفرن.
