بسطيلة فهاد الحجم كنحتاج ليها
- كيلو ونصف كروفيت
- كيلو كلمار
- كليلو مرلان او اي حوت ابيض كيعجبكم
- حزمة قزبر ومعدنوس
- ابزار،ملح،تحميرة،اسكنجبير،كمون، خرقوم بلدي او الزعفران شعرة الى كان ،هريسة،4فصوص ديال الثوم،عصير 3حامضات كبار،نصف حامضة مصيرة مقطعة رقيقة
- بكية الشعرية الصينية
- نصف كيلو ورقة
- زبدة
- فرماج احمر
- زيتون مقطع غير شوية
- شامبينيو اسود او العادي
الطريقة:
أول حاجة كنجود الشرمولة كنقطع القزبر رقيق بكمية كبيرة وكنزيد كاع دوك الثوابل والحامض معصر وكنبدا
نقيت الكروفيت ونقصت شي حبات كبار للتزين شحرتو فشوية دالزبدة وزدت عليه الشرمولة ونقصت البوطة غطيتو خمس دقايق من بعد حيدتو درتو يتسقطر فالشبكة وداك الما لي بقا فالمقلة زدت عليه الكلمار وزدت شوية دالشرمولة وغطيت عليه عاود حتى طاب ورتو يتسقطر وهادك الما رقدت فيه الفرميسيل وعاودت درت شوية دالزبدة فالمقلة وشحرت الميرلان بعد مانقيتها من الجلدة والشوك وزدت عليها الشرمولة صافي شرملنا كولشي كنحطو كل واحد بوحدو خاص يكون ناشف وكرقد الشامبينون الاسود فالما طايب وكنصفيه ونقطعو او تقرو ديرو الشامبينيو العادي قطعوه شوية صافي كندهنو الطاوة بالزبدة مدوبه وكنفرش الورقة راكم عارفين الطريقة ولي ماعرفاش دخل يوتوب تشوف الشيف نادية مهم كتفرشو الحشو الاول الميرلان خلطتها مع الفيرمسيل والشامبينيو وزدت معاهم شوية دالملح والهريسة خلطت مزيان وحطيت الحشو ورشيت فوقو شوية فرماج حمر وزدت الطبقة الثانية كروفيت عاود درت شوية فرماج حمر وعاو الطبقة الاخيرة كلمار ودرت الفرماج وجمعت البسطيلة وديما كندهن بالزبدة
وعنداكم تكترو فرماج بزاف تجيكم مالحة
وبالصحة والراحة
