بلا كترت الزيوتات.. هادي هي الطريقة الساهلة لي كندير لملوي والمسمن وكيجني مورق وهشيش




الطريقة العادية للعجين نفس قياس الفورص ويكون من النوع الممتاز ونفس كمية سبسيال وشوية دالخميرة وضروري من الما البارد ماشي دافي اوا هذا السر الاول باش كينجح


نعجنوه عادي ندلكوه ماتكون لعجينة لاقاسحة ولا جارية ونخليوها ترتاح شوية ومن بعد كنعملو لعجينة كويرات ونستفوها فصينية مدهونة اونغطيوها ببلاستيكة ونخليوها ترتاح
وفهاد الوقت نوجدو السر الثاني ديالنا
كناخدو زلافة نديرو فيها كمية من الزبدة والزيت والسميدة نكتروها شوية وخمارة ديال الحلوة كنخلط حتى كيتجانس كلشي
ونحط زلافة اخرى فيها الزيت


نبداو بالمسمن:

اوا الكويرات راه ارتاحو طلقيهم مزيان دهني شوية ديال داك الخليط دالزبدة والسميدة وربعي عادي وكرصي وبداي طيبي فمقلاة سخونة مرشوشة بالزيت صافي بلا متبقاي ترشي الزيت غير رميها شوية وقلبيها دغيا وبداي تدوري فيها فالمقلاة باش طيب من كل الجناب بلا مضغطي عليها حيت غادي تخصري ليها التوراق
شوفو كيف كايتنفخ فحال البطبوط اوا كررو نفس العملية حتى تكملو الكمية لي عندكوم
ندوزو للملوي:

نفس العجينة قسمتها ودرت الكويرات كبار على دياول المسمن اوا طلقيهم بالطول
ودهنيها حتى هي بالخليط وكنكرر ماتكتريش وبداي تلوي على الطول
ثم على العرض حتى تكملي الكمية لي عندك
هاهما حتى هما ارتاحو كرصي وبداي تطيبي ورشي شوية دالزيت صافي وبداي تقلبي حيت ديك الزبدة والزيت لي لداخل كافيين باش يطيبو
اوا بدا تقلبو وتدوروه غير بالحنان حتى يتحمر