نقدم لك سيدتي شوفو طريقتي في إعداد طبق اللازانيا كيجي شهوة منو ولي ذاقو عندي كيحماق عليه
المقادير:
- علبة أوراق اللازانيا
- 300 غرام كفتة
- بصلة مقطعة
- 4 مطيشات مقطعين
- ملعقة كبيرة مطيشة الحك
- 3 ملاعق كبار زيت
- 2 ضروس الثومة
- ملح – ابزار
- زعتر يابس
- زلافة كبيرة صلصة البيشاميل
- فرماج أحمر محكوك
الطريقة:
نشحرو البصلة في الزيت مع الثومة و الزعتر، نضيفو عليهم المطيشة، مطيشة الحك، الملح و الابزار، نضيفو ليهم كاس و نصف ماء و نخليوهم يطيبو شوية، و نضيفو ليهم الكفتة، نحركوها مزيان باش ماتبقاش مكورة و نخليوها تطيب، من بعد نضيفو ليها 2 كيسان ماء و نخليو الخليط يغلي 10 دقائق، ماخاصهاش تنشف ناخدو مول مربع، نديرو طبقة من صلصة الطماطم و الكفتة، نحطو أوراق اللازانيا و نبداو نديرو الطبقات، نديرو طبقة أخرى من الصلصة، فوقها طبقة من صلصة البيشاميل، و طبقة من الفرماج محكوك، و نغطيو باوراق اللازانيا و نعاودو العملية حتا نديرو 3 طبقات نغطيوها أخيرا بالصلصة، صلصة البيشاميل و الفرماج محكوك و ندخلوها للفران تطيب مدة 20 حتال 25 دقيقة و نقدموها بالصحة و الراحة
