وصفة الكيك بالشكلاط و نكهة القهوة سريعة الذوبان من عند الشاف زينة سلوان
المقادير:
- 3 بيضات
- 90غ شكلاط أسود غني “غيش”
- 4 كؤوس شاي (العنبة) دقيق
- كأس و نصف سكر
- كأس ونصف زيت
- كأس شاي ماء ساخن
- 6 معالق صغار عامرين قهوة سريعة الذوبان (نيسكافي)
- 2 معالق كبار كاكاو مسوس (نوع جيد)
- 3 خميرات
الطريقة :
كنخدمو البيض و السكر جيدا 7د على الأقل ، و في هاد الأثناء كنضيفو القهوة و الشكلاط للماء الساخن و نحركو مزيآآن ، باش القهوة و الشكلاط يدوبو، و نضيفوه لخليط البيض، نزيدو الزيت، و خليط الدقيق والخميرة و الكاكاو مغربلين و مخلطين مع بعض، نحركو الكل مزيان ، و نصبو في قالب الكيك.
ندخلو المول للفرن مسخن على درجة الحرارة 150° مدة 40 د أو حسب نوعية الفرن.
* نحضرو الشراب لي غنسقيو بيه الكيك منين نخرجوه: بتحضير كأس شاي ماء ساخن غندوبو فيه 2 معالق صغار نيسكافي و 2 معالق صغار سكر، نحركو مزيان.
نحضرو صلصة الشكلاط للتزيين: ناخدو 140غ قشدة الطبخ ونغليوها فوق العافية و نطفيو العافية و مباشرة نضيفو 90غ شكلاط أسود غني، و نحركو مزيآن باش يدوب و نسقيو بيها الكيك ديالنا، و نزينوه من الفوق بحبيبات الشكلاط أو حسب الرغبة.
بالصحة و الراحة.
